Шатахууны үнээр шоу хийж эхлэв үү

Дэлхийн зах зээлд шатахуун үнэ буурсан ч манай улсад огт нөлөөлөхгүй байгаа нь ихээхэн шүүмжлэл дагуулаад байгаа билээ.

Чухам яагаад үнэ нь буурахгүй байгаа шалтгааныг салбарынхан нь үнийг тогтвортой барихын тулд хэмээн тайлбарлаж буй.

Тодруулбал, энэ талаар Уул уурхайн сайд Р.Жигжид манай улс импортын шатахуун хэрэглэдэг тул үнийн савлагаанд өртөх эрсдэлтэйг хэлсэн байдаг. Иймд өдгөө дэлхийн зах зээлд буураад буй газрын тосны үнэ цаашдаа хэрхэхийг ажиглаж байгаагаа салбарын сайд хэлсэн.

Түүнчлэн Газрын тосны газрын дарга Г.Өлзийбүрэн "Олон орны эксперт, судлаачид газрын тосны үнэ ирэх онд буурна гэж огт ярихгүй байна. Энэ ч аргагүй. Хэрэв үнэ одоогийнхоос буурвал дэлхий нийтээр газрын тосны хайгуул, олборлолт доголдоно. Олон цооног хаагдана. Бид энэ бүгдийг тооцоод шатахууны үнийг тогтвортой байлгах нь зүйтэй гэж үзэж байгаа” хэмээсэн.

Үүний тулд шатахууны онцгой албан татвар нэмснээр тодорхой хэмжээний орлогыг төсөвт төвлөрүүлж, үүгээрээ сан бүрдүүлэх аж. Уг сангийн хөрөнгийг түлш, шатахууны хангамж, аюулгүй байдалтай холбоотой нөөц бүрдүүлэхэд зарцуулна гэлээ.

Харин МАН-ынхан үүний эсрэг байр суурьтай байгаа аж. Өнөөдөр УИХ дахь МАН-ын бүлгээс долоо хоног бүр зохион байгуулдаг мэдээллийн цагийн үеэр УИХ-ын гишүүн Я.Содбаатар шатахууны үнийг литр тутамд нь 250-310 төгрөгөөр буулгах боломжтой гэж хэллээ.

Түүний гаргасан энэхүү тооцоо хэрвээ амьдрал дээр хэрэгжсэн бол бараа бүтээгдэхүүний үнэ дагаад буурах боломж байсан гэнэ.

Гэвч төрийн эрх баригчид шатахууны онцгой албан татварыг нэмэгдүүлж байгаа нь ийнхүү манай улсад шатахууны үнэ буурахгүй байгаад нөлөөлж байгааг тэрбээр хэлсэн юм.

Хоёр намын ийнхүү эсрэг тэсрэг байр суурь бүхий мэдээлэл нь өнөөдөр иргэдийн толгойг нэг мөсөн эргүүлж, хэнд нь итгэхээ мэдэхгүй байдалд хүргэлээ.

Эдийн засаг хямарч, 100 төгрөгийн шүдэнзийг хүртэл зээлээр авч байгаа энэ хүнд үед иргэдийн худалдан авах чадвартай шууд холбоотой шатахууны үнээр ингэж шоу хиймээргүй байлтай.

Гэтэл төрийн толгойд байгаа эрхмүүдийн ийнхүү шуудайд хийсэн үхрийн эвэр мэт аяглаж, хөлөө жийлцсээр байгаа нь ард олноо улам туйлдуулж байна.

Уг нь тэднийг төрийн асуудлыг хамтаараа ярилцаад, шийдээд өгөөч гэж ард түмэн сонгосон биш гэж үү.

mnews.mn