Сум хөгжүүлэх сангийн зээлийн хугацаа хэтрэлттэй 52 иргэн, ААН-ийн торгуулийн хүүг хөнгөлнө

Сум хөгжүүлэх сангаас зээл авсан хэдий ч цаг хугацаандаа төлөхгүй хугацаа хэтрэлтэй байгаа зээлдэгчдийн зээлийг төлүүлэх аяныг сарын хугацаатай зохион байгуулахаар болжээ. Нийтдээ 52 иргэн, аж ахуй нэгж зээлийн хугацаа хэтрэлттэй байна.Тус сангаас зээл аваад хугацаандаа төлөхгүй байгаа зээлдэгчийн хугацаа хэтрэлт, муу ангилалд шилжсэн, шүүхийн байгууллагаар шийдвэрлэгдэж байгаа зээл сангийн 13,9 хувийг эзэлж байгаа учраас зээл төвлөрүүлэх аяныг 11-р сарын 20-оос 12-р сарын 20-ныг дуустал нэг сарын хугацаатай зохион байгуулахаар болжээ.

Дээрх аяны хугацаанд зээлээ төлсөн иргэн, ААН-д сум хөгжүүлэх сангийн дотоод журмын дагуу хүүнд хөнгөлөлт үзүүлж, шүүх, ШШГГ-аар шийдвэрлүүлж байгаа нэр бүхий 8 зээлдэгчийн торгуулийн хүүг 50 хувь, зээл төлөөгүй 44 зээлдэгчийн торгуулийн хүүг 100 хувь хөнгөлж байна.

Сум хөгжүүлэх сангийн дотоод журманд өмнө нь хугацаа хэтэрсэн зээлгүй, зээлийн өргүй иргэнд дахин зээл олгоно гэж заасан байдаг учраас зээлээ цаг хугацаандаа төлөөгүй иргэнд ахин итгэл үзүүлж зээл өгөх боломжгүй болдог байна. Нэмж мэдээлэхэд сум хөгжүүлэх сангийн 2016 оны тэргүүлэх чиглэлийг урьдчилсан байдлаар гаргажээ.

Үүнд хүнсний чиглэл, хөдөө аж ахуйн, боловсруулах үйлдвэрлэл, барилгын материал, гэр хорооллын алслагдсан багт нийтийн аж ахуй хөгжүүлэх, үйлчилгээний гэсэн 6 чиглэлийг гаргажээ.

erdenetinfo.mn