Өчигдөр буюу 10-р сарын 13-ны Пүрэв гарагт Монголын коксжих нүүрсийг гуравдагч зах зээлд хүргэх чиглэлээр хамтран ажиллах санамж бичигт Японы талаас Сумитомо корпораци, Монголын талаас Энержи Ресурс ХХК нар гарын үсэг зурлаа.

Монгол Улсын Ерөнхий сайд Ж.Эрдэнэбатын Япон улсад хийж буй айлчлалын хүрээнд энэ санамж бичиг зурагдсанаар Монголын Тавантолгойн нүүрс Япон, Солонгос гэх мэт далайн чанадын гуравдагч зах зээлд хүрэх боломжууд нээгдэж байна.

Санамж бичгийн хүрээнд Тавантолгойгоос олборлож, баяжуулсан коксжих нүүрсийг БНХАУ-ын нутгаар дамжуулан, далайн чанадын зах зээлүүдэд эхний ээлжинд туршилтын журмаар хүргэнэ. Мөн Монгол нүүрсийг гуравдагч зах зээлд урт хугацаанд нийлүүлэх, экспортын тогтвортой хамтын ажиллагааг бий болгох гол зорилготой юм байна. Япон бол ган үйлдвэрлэлээр тэргүүлэгч, Азийн хөгжингүй орнуудын гол төлөөлөгч. Энэ утгаараа импортоор худалдан авдаг нүүрсэндээ чанар, стандартын нарийн шалгуур тогтоодог. Иймээс ч коксжих нүүрсийг түүхийгээр нь биш, зөвхөн баяжуулсан, чанарын тогтсон стандартад нийцсэн байдлаар экспортлоно гэдгийг санамж бичигт зааж өгчээ.

Сумитомо группын төлөөлөгч ноён Фуживара

Манай улсын хувьд нүүрсний экспортоос орлого олж эдийн засгаа тэтгэнэ, ганц Хятадын зах зээлээс хараат байхаас татгалзаж, гуравдагч зах зээлд бүтээгдэхүүн гаргана гэж байнга ярьдаг ч дэд бүтцийн сул хөгжил, улстөрийн тогтворгүй байдлаас болж өнөө хэр нүүрсээ зөвхөн урд хөршид нийлүүлж ирсэн.

Харин одоо энэ мэт ажил хэрэгч санаачилгуудын дүнд монгол нүүрс далайн чанадын орнуудад хүрэх боломж нээгдэж байна. Гэхдээ Япон, Солонгост нүүрсээ нийлүүлэхэд наана нь шийдвэрлэх ёстой олон асуудал байгааг мэргэжилтнүүд хэлдэг. Ядаж л нүүрсээ автомашинаар тээдэг өнөөгийн болхи байдлаар амжилт олоход хэцүү. Экспортын гол гарц Гашуунсухайтын боомтоо олон улсын статустай болгох, транзит тээврийн нөхцлийг тохирох, сайжруулах гээд олон асуудал шийдэл хүлээсээр байна.

Б.Ундрам

http://www.ikon.mn/n/uow