Жил бүрийн 12-р сарын 1 өдөр дэлхий нийтээр тэмдэглэн өнгөрүүлдэг ДОХ-ын эсрэг өдрийг угтан энэхүү нийтлэлийг бэлтгэлээ. Өнөөдөр дэлхий дахинд ХДХВ-ийн халдвартай 34 сая хүн амьдарч байна. Сүүлийн жилүүдэд олон нийт ДОХ өвчин, ХДХВ-ийн халдвар гэсэн хоёр ойлголтыг ялгаж салгадаг болж, энэ өвчнийг үхлийн ял мэт хүлээн авдаг байсан хандлага ч өөрчлөгдсөн. ДОХ-ын эсрэг дэлхийн өдөр ойртож буй энэ өдрүүдэд америкийн телевизийн жүжигчин Чарли Шин ХДХВ-ийн халдвартай гэдгээ дэлхий дахинд зарлаж, хаалттай байсан гэж хэлж болох энэ сэдвийг нээж орхилоо. Дэлхий дахин ДОХ өвчний тухай мэддэг ч ДОХ-той хүмүүс яаж амьдардаг талаар ойлголтгүй байлаа. Жүжигчин Чарли Шин өнгөрсөн хугацаанд бэлгийн бүх хамтрагчиддаа ийм халдвартай гэдгээ илэн далангүй хэлдэг байснаа дуулгасан нь ДОХ гэсэн үгнээс өөрөө ч мэдэлгүй айж цэрвэдэг олон хүнд нэгийг бодогдууллаа. Тэгвэл Hiub энэ удаад ХДХВ-ийн халдвартай эмэгтэй хүний амьдралыг дэлгэх гэж байна.

Аманда Маммадова гэгч бүсгүй (бүх нэрийг өөрчилсөн) ХДХВ-ийн халдвартай ч аз жаргалтай амьдарч болно гэдгийг батална гэж ам бардам ярьж байна. Аманда ирэх хоёрдугаар сард  гурван нас хүрэх нэг охин, дөрвөн сартай хүүтэй, өөрийг нь халдвартайг үл харгалзан хайрладаг нөхөртэй, жирийн л нэг бүсгүй. Жүжигчин Чарли Шин нууцаа дэлгэсэн тухай мэдээ тархсан даруйд Амандагийн ээж охин руугаа утас цохижээ. Энэ мэдээг сонсоод Амандад эхлээд харуусал, дараа нь гуниг, цаашлаад уур бухимдал, хамгийн сүүлд нь би яах бол гэсэн айдас төрсөн байна. Аманда 26 настайдаа бусдын л адил хайрлаж дурласан, хөгжилтэй нэгэн байжээ. Бүх зүйл дээр санаа нийлдэг, ижилхэн зүйл дээр инээчихдэг, хамт гадуур гарах, найзуудтайгаа уулзах дуртай Полтой танилцаж хамт амьдрах болжээ. Орчин үеийн соёлтой залуусын адилаар Аманда Полоос БЗДХ авч байсан эсэхийг нь асуухад Пол ч нуулгүй хэлжээ. Харин Аманда дэлгэрүүлж асуугаагүй нь түүний алдаа байсан юм. Аз жаргалтай хос английн Милтон Кейнес хотод байшин худалдан авч хоёр жил хамт амьдрав.

Харин тэдний хайр дурлал эцэс болоход худалдаж авсан байшингаа зарж, Аманда шинэ амьдралаа эхлэхээр Турк улс руу  явж, фитнесийн дасгалжуулагчийн ажилд оржээ. Тэнд Аманда одоогийн нөхөр Алитайгаа танилцжээ. Тэд нэг зочид буудалд ажилладаг байлаа. Аманда фитнессийн багш, харин Али гэрэл зурагчин. Аманда 2010 оны нэгдүгээр сард эх орондоо эргэж ирээд жил бүр л өгдөг эмэгтэйчүүдийн шинжилгээнд  хамрагджээ. Долоо хоногийн дараа гар утсанд нь дуудлага ирэхэд Аманда ямар муу мэдээ дуулах гэж байгаагаа төсөөлсөнгүй. "Миний толгой дотор бөмбөг дэлбэрэх шиг л болсон. Яг тэр үед би цонхны тагтан дээр зогсч байсан болохоор хамгийн түрүүнд үсэрье гэсэн л бодол орж ирсэн.  Би үхэх болов уу? Хэр хугацаа үлдсэн бол? Хэр их хугацаа үлдсэнийг хэн ч мэдэхгүй шүү дээ” гэж Аманда аймшигт өдрүүдээ дурслаа. Сэтгэлээр маш их унасан тэр өдрөө Аманда, Туркт үлдсэн Алитай интернетээр холбогдож шинжилгээнийхээ хариуг дуулгажээ. "Дахиж уулзахаа болъё гэсэн үг хүлээж байтал  тэр чи бид хоёр ямар ч халдвартай байсан хоёулаа даваад гарна аа гэсэн юм даа” гэж хэлэхдээ Аманда сэтгэл өөдрөг байлаа. Эхэндээ Аманда унтаж чадахгүй, хоолойгоор нь хоол давдаггүй байж. Харин Амандад зөвлөгөө мэдээлэл өгдөг эмнэлгийн ажилтны хэлсэн ганц өгүүлбэр түүнд урам зориг хайрлажээ.

ХДХВ гэдэг бүх насаар хоригдох ялтай адил, гэхдээ ХДХВ нь цаазын ял байхаа больсон.