З.Баянзул

Театр урлагийн мэргэжилтэн, жүжигчин

Хүн эх орноо сонгож төрдөггүй. Намайг сонгосон эх орондоо хайртай. Эрс тэрс уур амьсгал нь монголчуудыг тэсвэр хатуужилтай, ухаалаг хэрсүү болгосон.

Д.Төрмөнх 

Найруулагч

Ээждээ хайргүй хүн байдаг юм уу? Миний эх орон юм чинь!

Б.Алтансувд

Барилгын зургийн инженер

Би уртын, ардын, зохиолын дуу ер нь сонсдоггүй байсан л даа. Нэг удаа ажлынхнаараа зугаалгаар явсан юм. Манай жолооч ах "Эр бор харцага” гэдэг дуугаар бидэнд ая барилаа. Харин энэ дууг сонсоод би өөрийн эрхгүй уйлсан.Би ганцаараа ч уйлаагүй. Анх удаа би дуу сонсоод уйлж бас чин сэтгэлээсээ монгол хүн болж төрснөөрөө маш их бахархсан даа.

Ц.Уртнасан

Улсын Ерөнхий байцаагч

Байгалийн дөрвөн улирлын өөрчлөлтийг өдөртөө үзэж чадах, эрс тэс ширүүн уур амьсгал, амьдралын өвөрмөц хэв маяг нь намайг дэлхийн хаана ч амьдарч, ажиллаж, хэнтэй ч хэл амаа ололцох гайхамшигтай дасан зохицох чадварыг өгсөн нутагтаа би хайртай.  Өргөн уудамд нь хараа бэлчээж, уужим амьсгалах, нар нь ойрхон, өнгөний зохицлын гайхамшиг, дурсамж дүүрэн Говьгурван сайхан уулын өвөр Хүрмэн нутагтаа хайртай. Энэ л миний хайртай байхын шалтгаан юм даа.

Б.Тунгалаг

Хүүхэлдэйн киноны зураач, найруулагч

Хөдөө ахындаа очоод үхрээ хариулж, голын эрэг даган аргал түүж явахдаа, хүйтэн булгийнх нь эрэг дээр сууж байхдаа, өглөө гэрт сэрээд зууханд гал дүрэлзэн асахыг сонсож хэвтэхдээ, таваг дүүрэн нойтон өрөм өмнө минь таваглаж тавихад, үнээ сааж суугаа хөгшин эгчийгээ харж суухад би энэ сайхан нутагт амьдрах азтайгаа мэдэрч эх орондоо хайртай байдаг. Ах дүүс миь цугларч гэр дүүрээд хол ойрын хууч хөөрцгөөж, сав суулганд ааруул ээзгий, сүү тараг юүлэн аян замд минь үдэж өгөх үед би Монголдоо хайртай гэдгээ мэдэрдэг.

Б.Соёмбо

Маркетингийн менежер

Хар багаасаа алхаж дассан тэр гудамж, цэцэрлэг, дэлгүүрүүд цаанаа л дотно. Ямар ч гудамж нэмэгдэж бий болсон үргэлж миний сэтгэлд хамгийн ойр дотно, хамгийн том орон зайг эзэлсээр байдаг. Миний амьдран буй газар бол миний хот. Сэтгэлд ойр дотно энэ өнгө төрх, хэв маяг, үнэр нь хүртэл нэг л өөр учраас би эх орондоо, төрөлх хотдоо хайртай. Би хичээнгүй сайд Цэрэндоржийн гудамжаар алхах үнэхээр дуртай. Монголдоо хайртай шүү, хайртай.

Л. Мөнх

Монгол нум судлаач, археологич

Намайг гэх бүхэн энд л оршино. Би wildlife чиглэлээр зураг авдаг болоод 15 жил өнгөрчээ. Энэ хугацаанд олон гол мөрөн, уул давааг давж зэрлэг амьтдыг судалж явахад Монгол орныхоо үзэсгэлэнд сэтгэл алдарсан минь одоо ч хэвээрээ. Археологийн мэргэжлийн дагуу өвөг дээдсийнхээ өв соёлыг нээн илрүүлж ямар их агуу сэтгэгчид байсныг нь бахдаад баршгүй. Энэхүү соёлын өв болсон 3000 жилийн түүхтэй язгуурын Монгол нумаа өөрийн гараар урлан сэргээж түүгээрээ дэлхийд гайхуулж чадсан нь эх орноо хайрлахын нэг шалтгаан минь. Мөн эх орондоо хайртай байх хамгийн том шалтгаан бол өөрийн гэр бүл минь гэж боддог.

Г.Азжаргал

Маркетингийн менежер

Монголдоо хайртай байх олон шалтгаан байнаа. Жишээ нь манай Улаанбаатар хот шиг эрх чөлөөтэй хот хаана байна. Бусад улсуудын хотод амьдрахад амар тайван юм шиг санагдах ч хэтэрхий уйтгартай. Өглөөнөөс орой хүртэл нэгэн хэвийн амьдрал үргэлжилдэг. Харин манай хотод өглөө гараад явахад юу ч тохиолдож магадгүй, хэнтэй ч тааралдаж болзошгүй. Сонирхолтой гэдэг утгаар нь ярьж байна л даа. Заримдаа төлөвлөгдөөгүй гэнэтийн зүйл амьдралыг сонирхолтой болгодог шүү дээ. Залууст эрх чөлөөтэй байх олон боломжийг олгодог болохоор нь Монголдоо бас Улаанбаатартаа хайртай.