“Эрдэнэт Үйлдвэр”-ийн Гүйцэтгэх захиралд 40 орчим хүн өрсөлдөж байна

"Эрдэнэт Үйлдвэр”-ийн (ЭҮ) Гүйцэтгэх захирлын сунгаа үргэлжилсээр байна. Эх сурвалжуудын хэлснээр 40 орчим хүний анкет ЭҮ-ийн ТУЗ-ийн гишүүдийн гарт иржээ. Гүйцэтгэх захирлын нэр дэвшүүлэлтэд Засгийн газрын талын хувьцаа эзэмшигчид давуу эрхтэй оролцож байгаа бөгөөд тэдний зүгээс нэр дэвшүүлсэн 40 орчим хүний бараг 90 хувь нь улстөрчид байгаа аж.

Тиймээс ч 49 хувийн эзэмшигч буюу "Монголын Зэс Корпораци"-ийн зүгээс улстөрч бус мэргэжлийн томилгоо хийнэ гэсэн бодлогод Засгийн газрын санал болгосон хүмүүс нийцэхгүй байгаа талаар эх сурвалж мэдээллээ. "Эрдэнэт Үйлдвэр”-ийн Гүйцэтгэх захирал болох хамгийн өндөр магадлалтай гэгдэж байсан Ч.Ганзориг харин энэ жагсаалтаас хасагдсан байна.

Учир нь түүнийг өмнө нь энэ албан тушаалд байхдаа холбогдсон "Жаст”-ын хэрэг, түүхий эдийн үнийн өсөлтийн үед үйлдвэрт зөв менежмент барьж чадаагүй зэрэг шалтгаанаас болж нэр дэвшүүлэлтээс хасжээ.

Хэдийгээр "Монголын Зэс Корпораци" нэр дэвшүүлэх эрхгүй ч "Эрдэнэт Үйлдвэр”-ийн ТУЗ-ийн гишүүн Да.Ганболд болон "Оюу Толгой”-н Гүйцэтгэх захирлаар ажиллаж байсан Эндрью Вүүдлэй, Камерон МакРей нарыг Гүйцэтгэх захиралд санал болгоод байгаа гэнэ.

Хоёр талын санал ийм хол зөрүүтэй байгаа нь "Эрдэнэт Үйлдвэр” хэзээ гүйцэтгэх удирдлагатай болох вэ гэдэг асуудлыг улам бүр бүдгэрүүлж байна.