"Жаст” групп Стандарт банкнаас зээл авахад батлан дааж холбогдох баримт бичгүүдэд гарын үсэг зурсан гэгдэх Ч.Ганзоригийг АТГ шалгаж байгаа гэдгээ мэдэгдлээ. Тодруулбал, "Эрдэнэт” үйлдвэрийн 51 хувьтай холбогдуулан  үйлдвэрийн захирал асан Ч.Ганзориг, Хуулийн хэлтсийн дарга Б.Мөнхжаргал нарт эрүүгийн хэрэг үүсгэн, яллагдагчаар татан шалгаж байгаа юм байна. Тэгэхээр "Эрдэнэт” үйлдвэрийг арбитрын шүүх хүртэлх маргаанд хутгаж хаясан нэр бүхий хүмүүсийн хэрэг хуулийн байгууллагаар шийдэгдэж мэдэх нь. Ер нь бол олон жил яригдаж буй сэдэв. Арбитрын шийдвэр эцэслэж гараагүй байсан бол Ч.Ганзориг нар гэмгүй цагаан тагтаа шиг зүйлсээ ярьсаар байж байх байсан биз. Гэвч нэгэнтээ байдал бишдэж, улс даяараа буруутныг хайх дээрээ тулаад буй энэ нөхцөлд зээлийн гэрээнд батлан даагчаар оролцсон нөхдүүд уснаас шууд хуурай гарчих нь хэцүү л дээ.

Өчигдөр, УИХ-ын гишүүн Ж.Батзандан мэдээлэл хийхдээ "С.Баяр Эрдэнэтийн 51 хувийг барьцаалан Стандарт банкнаас зээл авсан ажиллагаанд оролцсон гэж хэлсний төлөө намайг шүүхэд өгнө гэж байна. Энэ үйл явдал С.Баярыг Ерөнхий сайд байхад болсон. Тэгэхээр оролцсон байх магадлалтай.Эрдэнэт дээр Монгол Улсын хууль зөрчигдөж байхад би мэдээгүй, надад хамаагүй гээд сууж байдаг Ерөнхий сайд байдаг юм уу? Стандарт банкинд Эрдэнэт үйлдвэрийг барьцаалан зээл авах үед Ч.Ганзориг гэж хүн Эрдэнэтийн захирлаар ажиллаж байсан. Энэ хүн С.Баярын шууд удирдлага дор ажилладаг хүн. С.Баяр Америкт 7-8 хаустай. Энэ хүн уснаас хуурай гараад бултах боломжгүй. Жаст-ын ерөнхийлөгч Ш.Батхүү гэдэг хүн С.Баярын ойрын найз” гэж байна лээ. Энэ яахав, Ж.Батзандангийн үг л дээ. Хуулийн байгууллага л шалгаж тогтоох ёстой.

Дашрамд өгүүлэхэд, нэр бүхий гишүүд Ерөнхий сайдаас Эрдэнэт үйлдвэрийн асуудлаар асуулгын хариугаа аваад буй. Тэрхүү хариунд бичсэнээс үзэхэд Ч.Ганзориг нар нэлээн хэрэг тарьсан нь харагдаж буй. Тухайлбал, Эрдэнэт үйлдвэр ХХК-аас ирүүлсэн мэдээллээс авч үзвэл 2010-2013 онуудад Стандарт банкнаас нийт 213,3 сая ам долларын орлогын гүйлгээ Эрдэнэт үйлдвэрийн холбогдох дансанд орж ирсэн байна. Энэхүү орж ирсэн мөнгө нь Меркентал хаус, Миллфорд Глобал корпорациас төлөгдсөн борлуулалтын орлого гэж бүртгэгджээ. Уг орлогоос УБТЗ ХНН-д тээврийн хөлсний төлбөрт 55,6 сая ам доллар, Жаст компаниас нийлүүлсэн түлш, шатахууны төлбөрт 41,2 сая ам.доллар зэрэг төлбөрт Эрдэнэт үйлдвэр ХХК-аас шилжүүлсэн байгаа юм.

Тэгэхээр энэ мөнгө орж гарсан он жилүүдэд Ч.Ганзориг тус үйлдвэрийг удирдаж байсан.

2009 оны Үндсэн зээлийн гэрээний талаар гаргасан шийдвэрт:

"Эрдэнэт үйлдвэр” ХХК-ийн гүйцэтгэх захирал Ч.Ганзориг тухайн гэрээнүүдэд гарын үсэг зурах эрх мэдэлтэй байсан.

2010 оны Үндсэн зээлийн гэрээний талаар гаргасан шийдвэрт:

-Тус зээлийн гэрээнд холбогдох урьдач нөхцөл бүхий баримт бичигт Г.Амарбат, Ч.Ганзориг нар гарын үсэг зурсан;

-Тус зээлийн гэрээтэй холбоотой барьцаа гэрээний эрх шилжүүлэх тухай мэдэгдлийг "Эрдэнэт үйлдвэр” ХХК-аас дамжуулснаар эрх шилжүүлэлт хүчин төгөлдөр болсон талаар дурдсан байгаа юм.

Тэгэхээр Ч.Ганзориг нарын эдгээр үйлдлүүдийг хуулийн байгууллага нягтлан шалгаж буй биз ээ.

 

Эх сурвалж: Hunnu.mn