Улаанбаатар/МОНЦАМЭ/.АТГ-ын дэргэдэх Олон нийтийн зөвлөлөөс АТГ-ын үйл ажиллагааны талаар сэтгүүлчдэд мэдээлэл хийлээ.

2017 онд "Авлига ба хууль эрх зүйн тогтолцоо тайлан”-д дурдсанаар Монгол Улсыг хараат шүүхтэй гэж дүгнэсэн байна. Мөн авлигын төсөөллийн индексээр Монгол Улс 180 улсаас 103 дугаарт жагссан аж. Уг индекс нь төрийн үйлчилгээ, төрийн төлөөлөл, гишүүдийн авлигын байдлыг илтгэдэг байна.

Үүнээс гадна, Монгол Улс дэлхийн авлигын браметрээр 95 орноос 76-д жагссан, нам, хууль тогтоогчид хамгийн их авлигад автсан гэсэн дүгнэлт гарчээ. Уг үзүүлэлтийг жирийн иргэд өдөр тутамдаа авлигатай нүүр тулж байгаа эсэхэд дүгнэлт гаргадаг байна. Судалгаанд хамрагдсан хүмүүсийн 45 хувь нь сүүлийн 12 сарын дотор "Төрийн үйлчилгээг авахын тулд авлига өгсөн” гэж хариулжээ.

Дэлхий нийтэд авлигыг хэмжих гурван хэмжүүр байдаг ч энэ талаарх мэдээлэл Монгол Улсад байдаггүй. Эл чиглэлд Монгол Улс соён гэгээрүүлэх ажил хийдэггүй гэж АТГ-ын дэргэдэх Олон нийтийн зөвлөлөөс дүгнэжээ.

Мэдээллийн үеэр Олон нийтийн зөвлөлийн дарга Г.Баасан хэлэхдээ, "Монгол Улсын улс төрийн намууд, хуулийн байгууллагууд, УИХ-ын гишүүд, төр захиргааны байгууллагууд, төрийн үйлчилгээ, уул уурхайн салбар, газрын алба, гааль, татвар, тендэр, худалдан авах газар авлигад асар их автсан байна. Авлигын эсрэг хууль, авлигын эсрэг авах арга хэмжээ тодорхой бус, ойлгомжгүй зөрчилтэй буюу нэг нэгнээ үгүйсгэсэн байдалтай байдаг. Монгол Улс системийн буюу төрийн өндөр албан тушаалтнуудын авлигад бүрэн идэгдсэн байна. Логик дүгнэлт хийхэд төр засаг нь авлигад бага идэгдсэн атлаа эрүүл мэнд, боловсролын салбарт авлига өндөр байна гэх нь утгагүй. Монголд системээрээ авлигад идэгдсэн учраас дэд салбарууд нь авлига байсаар байна. Системийн авлигаас ангид аль нэг салбарын авлига өндөр байна гэж байхгүй.

Монгол Улс системээрээ авлигад идэгдсэний тод жишээ Эрдэнэт үйлдвэрийн асуудал байна. Монголын ард түмний өмч болох Эрдэнэт үйлдвэрийг бизнес эрхлэгчид болон уг үйлдвэрийн удирдах албан тушаалтнууд зээлийн барьцаанд тавих эрхзүй болон хуулиар олгогдсон эрх мэдэл байхгүй. "Эрдэнэт үйлдвэр"-ийг барьцаалсан этгээдүүд нь Монголын ард түмний өмчийг хууль бусаар үгсэн хуйвалдаж, авлигын гэмт хэрэг үйлдсэнийг АТГ шуурхай мөрдөн шалгаж буруутнуудад хариуцлага хүлээлгэх үүрэгтэй. Тодруулбал, С.Баяр, Д.Сугар, Ч.Ганзориг, Д.Очирхүү, Ш.Батхүү нар санаатайгаар эх орноосоо урвасантай дүйцэхүйц гэмт хэрэг үйлдсэн байна. АТГ Эрдэнэт үйлдвэрийг барьцаалсан дээрх нэр бүхий этгээдүүдийг өнөөдрийг хүртэл шалгахгүй хаацайлсаар иржээ. Иймээс АТГ-ын дарга огцрох ёстой гэж үзэж байна. Д.Сугарыг Үндсэн хуулийн цэцийн гишүүнээс, С.Баярыг Элчин сайдаас нь татаж нэн даруй шалгах шаардлагатай байна” гэв.

О.Мөнхжаргал