М.Энхболдын дараа Ц.Батбаяр 2006-2007 он хүртэл хоёр жил ажилласан. Түүний төсвийн орлого ч сайн байсангүй. 2006 онд 43.7 тэрбум, 2007 онд 52.4 тэрбум төгрөг төсөвт төвлөрч байжээ. Б.Билэгт 65.5 тэрбум төгрөгийг зарцуулаад ажлаа өгсөн. Г.Мөнхбаярын үед Улаанбаатар хот 2009 онд 133.3 тэрбум, 2010 онд 164.2 тэрбум, 2011 онд 246.4 тэрбумын орлого олжээ. Энэ бол хамтарсан Засгийн газар байгуулагдсан, эдийн засаг өсч байсан үеийн үзүүлэлт юм.
 
Тэгвэл Э.Бат-Үүлийн үед нийслэлийн төсвийн орлого түүхэнд байгаагүй хэмжээнд хүрч огцом нэмэгджээ. 2012 онд нийслэлийн төсвийн орлого 348.2 тэрбум, 2013 онд 474.8 тэрбум, 2014 онд 522.5 тэрбум, 2015 онд 532.7 тэрбум гээд гэрлийн хурдаар өсчээ. Нийслэлийн төсвийн орлого яагаад ингэж огцом нэмэгдэв гэдэг асуудал анхаарал татна. Нийслэлийн бүтэц, орон тоо эрс нэмэгдсэн. Хэрэглээний зардал нэмэгдсэн зэрэг нь нийслэлийн төсвийг томрох үндсэн шалтгаан болжээ. Мөн нийслэлийн иргэдийг торгох ажиллагаа гаарч, түүнээс орох орлого эрс өссөн. Одоо бас иргэдээсээ жил бүр 13 тэрбум төгрөгийг шинэ татвар авахаар болж байна. Үүнийг зарцуулж байгаа мөнгөө голж, шинэ эх үүсвэрүүд хайж, ард түмний халаасыг суйлж байна гэж ойлгосон ч болно.
 
Ерөнхийд нь дүгнэвэл 2000 оноос хойш МАН-ын М.Энхболд, Ц.Батбаяр, Б.Билэгт, Г.Мөнхбаяр нар нийслэлийг 11 жил удирдсан. Энэ хугацааны төсөв нийлээд ердөө 935 тэрбум төгрөг болж байна. Энэ мөнгөөр 11 жилийн хугацаанд албан хаагчдын цалин хөлсийг өгч, нийслэлийнхээ замыг засч, сургууль цэцэрлэг барьж байгуулсаар ирсэн. Гэтэл Э.Бат-Үүл гурван жил хагаст нийслэлийг удирдахад хотын төсвийн орлого 1.878 их наяд төгрөг болж томорчээ. Гайхмаар их мөнгө. МАН-ын үеийн 11 жилийн нийслэлийн төсвийн орлогыг хоёр дахин нугалсан мөнгө. Э.Бат-Үүлийн зарцуулсан энэ мөнгийг хийж байгаа ажилтай нь харьцуулбал тун хэцүүхэн хариу гарна. Түүнийг ийм их мөнгө зарцуулдгийг ард түмэн мэдэхгүй. Улаанбаатарчууд дуулаа ч үгүй. Хэрэв МАН-аас тохоогдон ажиллаж байсан дарга нар ийм их мөнгөтэй байсан бол нийслэлийн өнгө төрх их өөр байх байсан биз. Харин Э.Бат-Үүл зарцуулж байгаа мөнгө шигээ их зүйл хийж байгаа юу гэсэн асуулт хариулт нэхэж байна.
Зууны мэдээ