Эрдэнэт цэцэрлэгт хүрээлэн цогцолборын ажил наадмаас өмнө бүрэн дуусна

Манай аймагт 21 аймгийн онцлогийг харуулсан "Эрдэнэт цэцэрлэгт хүрээлэн” цогцолбор байгуулах ажил явагдаж байгаа. Тус цогцолборын гол барилгыг 2016 оны 1-р сарын 1 буюу Эрдэнэт хот байгуулагдсаны 40 жилийн ойгоор ашиглалтад хүлээн авна гэж төлөвлөсөн. Одоо цогцолборын ажлын явц ямар байгааг тодрууллаа.

Эрдэнэт Цэцэрлэгт хүрээлэн нутгийн удирдлагын байрны хойно хуучнаар хүүхэд залуучуудын соёл амралтын хүрээлэн байсан газарт байгуулагдаж байна.Одоогийн байдлаар цогцолборын гадна хашааны ажилд 300 сая төгрөг, шугам сүлжээний ажилд 60 сая төгрөг зарцуулжээ. Харин 870 сая төгрөгөөр барилгын гол хэсэг болох монгол гэр бүхий 5 давхар барилга байгуулах ажил 90 хувьтай байгаа гэнэ. Тус цогцолборын нийт төсөв 2 тэрбум гаруй бөгөөд ихэнх хувь нь орон нутгийн төсвөөс гарч байгаа юм.

Одоогийн байдлаар цаг агаарын байдлаас шалтгаалан гаднах ажил зогссон байна.Эх барилгаас гадна гадна тохижилт болох ногоон байгууламж, явган хүний зам, гэрэлтүүлэг зэрэг ажил хавраас хийгдэх юм байна.Эрдэнэт цэцэрлэгт хүрээлэн цогцолборт 21 аймгийн онцлог түүхийг харуулсан хөшөө дурсгалууд хийгдэнэ. Мөн гол эх барилгад 7D танхим байгуулагдах бөгөөд эндээс Эрдэнэт хот болоод, Эрдэнэт үйлдвэртэй бүрэн танилцах боломж бий болох юм байна.

Эрдэнэт цэцэрлэгт хүрээлэн бүрэн хэмжээнд ашиглалтад орсноор дотоодын болон гадаадын аялал жуулчлалын томоохон төв болох учраас аялал жуулчлалд оруулж байгаа хөрөнгө оруулалт болж байгаа гэдгийг онцоллоо. Эрдэнэт цэцэрлэгт хүрээлэн цогцолборын ажил улсын их баяр наадмаас өмнө бүрэн дуусна гэдгийг хэллээ.

Эх сурвалж: Erdenetinfo