Хятадууд Монголд “Чингис хаан”-ыг амилуулна

Дэлхийг байлдан дагуулсан Монголын Эзэн Чингис хааны тухай олон ангит шинэ киног хятадууд дахин бүтээхээр болжээ. Энэ талаар саяхан манай холбогдох албаны хүмүүстэй Хятадын нөлөө бүхий томоохон хүн ирж уулзаад ярилцсан байна. Дээрх киног ойролцоогоор 50 орчим сая доллараар хийхээр төсөвлөж байгаа бөгөөд санхүүжилтийн 20 хувийг тус улсын Засгийн газраас харин үлдсэн 40 сая долларыг тухайн нэр бүхий компани ивээн тэтгэж хийх гэнэ.

Урьд өмнө хятадууд Чингис хааны тухай 50 ангитай кино хийж, тэр ч бүү хэл саяхан тухайн киноны гол дүр Чингисийн дүрийг бүтээсэн Өвөрмонголын нэгдүгээр дэсийн жүжигчин Б.Баасанжавт Монгол Улсын Төрийн шагнал хүртээх гэж байгаа тухай цуурхал дэгдээд байгаа билээ. Чингис хааны тухай уран сайхны олон кино байсаар байтал чухам яагаад ийнхүү өөрсдийг нь дайлаар мордуулж, өвдөг сөхрүүлэн чичрүүлж байсан Монголын их хааны тухай хятадууд ийнхүү дахин дахин кино хийгээд байгаа нь цаанаа нэгийг бодогдуулна.

Ямартай ч их эзэн Чингис хааны тухай киноны зураг авалтыг Хэнтий аймгийн зарим нэг сум, мөн Төв аймгийн ганц нэг сум, тэр дотроо Тэрэлж орчимд зураг авалтыг нь хийхээр төлөвлөжээ. Хамгийн гол нь дээрх киноны зураг авалтыг Монголд хийлгэхэд чухам ямар утга учиртай санааг агуулсан, түүхийн үнэнийг хэр зэрэг өгүүлсэн эсэх нь тодорхойгүй байгаа бөгөөд удахгүй Монголын талд тухайн кино багийнхан өөрсдийн бичсэн кино зохиолыг ирүүлэхээр тохиролцоод буцжээ. Оросын нэрт найруулагч Сергей Бодровын "Монгол” хэмээх Чингис хааны тухай өгүүлсэн киног бид сайн мэднэ.

Тэрбээр цагтаа мөн л дээрх киног хийхийн тулд Монголын Боловсролын яамны сайдтай уулзаж байсан ч манайхан газар нутгаа ашиглуулахаас татгалзаж, төсөвт орох боломжтой байсан чамгүй хэмжээний газар ашиглалтын түрээсийн төлбөрөө алдсан байдаг. Улмаар тэд Казахстаны Засгийн газартай тохиролцоонд хүрсний эцэст дээрх киноны зураг авалтыг Казахстанд хийсэн нь хэн хэндээ ашигтай зүйл болсон гэдэг.

Ийнхүү удахгүй Чингис хааны тухай дахин нэг шинэ киноны зураг авалт Монголд хийгдэж магадгүй болоод байна.

Эх сурвалж www.wikimon.mn

Хятадууд Монголд “Чингис хаан”-ыг амилуулна

Санал болгох

Сэтгэгдэл