Х.Баттулга Зам тээврийн сайдын албыг дөрвөн жил хашихдаа "Төрөөс баримтлах төмөр замын бодлого" гээчийг хүртэл батлуулж явсан.  Сайд асан Х.Баттулга өмнөд төмөр замыг нарийн царигаар тавих тухай УИХ-ын тогтоолын төслийг эсэргүүцэж "Засгийн эрхэнд гарсан хужаагийн эрлийзүүд Монгол Улсыг Хятадын эрхшээлд оруулах гэж байна" гэсэн агуулгатай нэвтрүүлгийг "Hero intertainment" студид нэлээд их мөнгө зарж хийлгэж, тухайн үед багагүй асуудал үүсгээд байсан.   Харамсалтай нь тагнуулынхан уг нэвтрүүлгийн агуулга "монголчуудыг хагалан бутаргаж, үндэсний эв нэгдлийг бусниулах хандлагатай" хэмээн үзэж байсан цаг саяхан.

Уг нь Х.Баттулга гишүүний сайд байхдаа батлуулсан төмөр замын бодлого дотор "Эхний ээлжинд зүүн бүс рүү чиглэсэн хөндлөн төмөр замыг өргөн царигаар барина. Харин өмнөд төмөр замын царигийн асуудлыг Засгийн газар тухай бүрт нь УИХ-аар хэлэлцүүлж шийднэ" гээд хар дээр цагаанаар биччихсэн байдгийг олон эх сурвалж хэлж байсан.

Тэгвэл дээрх асуудалтай холбоотойгоор Хууль зүйн сайд асан Х.Тэмүүжин баримт дэлгэж, энэ талаараа " Нарийн цариг, танк, хятадын аюул гэж бусдыг айлгах атлаа өөрсөдөө төмөр зам, таван толгойг хэнд өгчихсөн гэнээ!!! " хэмээн жиргэжээ.

Түүний дэлгэсэн санамж бичгийн гол агуулга Монголын улстөрчдийн амь тавин тэмцээд байгаа Тавантолгой-Гашуунсухайт чиглэлийн 267 километр зам.  

Нэг хэсэг нь экспортын, нөгөө хэсэг нь "нүүрсний" хэмээн нэрлээд байгаа энэ төмөр замыг тавих гэж Монголын улстөрчид  өргөн, нарийн цариг дээр бүтэн долоон жил алдсан. Ямар сайндаа л нарийн царигтай төмөр замаар хятадууд цэрэг танктай ороод ирнэ гэсэн нэвтрүүлэг хүртэл хийж цацаж байх вэ дээ.

Гэтэл өнөөх хятадуудыг үзэж чаддаггүй гэх А.Гансүх зөвлөх нь Зам тээвэр, барилга хот байгуулалтын сайдаар Х.Баттулга ажиллаж байх үед тус яамны  Төрийн нарийн бичгийн дарга хийхдээ Зам тээвэр, барилга хот байгуулалтын яамыг төлөөлж Хятадын төмөр замын яамтай нэгэн гэрээг үзэглэхдээ Хятад Монголын хамтарсан төмөр замын компани байгуулж, 50:50 хувь эзэмшихээр, Тавантолгой-Гашуунсухайт, Сайшанд-Чойбалсан, Баруун Урт-Бичигт зэргээр Засгийн газраас барихаар төлөвлөж байгаа зүүн чиглэлийн бүх төмөр замыг хятадууттай хамтарч барихаар тусгажээ.

Энэхүү санамж бичиг өнөөдөр сошиал орчинд тарж, олон нийтийн анхаарлын төвд ороод байна.

  Zuvsongolt.mn