Төрийн албаны "хууль" бус халаа сэлгээ, томилгоо хэрээс хэтэрч байна. Сонгууль дөхөөд ч тэр үү,  иймэрхүү ёс зүйгүй үйлдлүүд гаарч байгаад олон хүн дургүйцлээ илэрхийлж байгаа юм.  Тухайлбал, МУ-ын сайд М.Энхсайханы төрсөн дүү М.Чаминцэцэг Байгаль орчин, аялал жуулчлалын яамны Төрийн захиргаа удирдлагын газрын даргаар томилогдож, хэдхэн сар ажиллах хугацаандаа ямар ч үндэслэлгүйгээр хэдэн арван хүнийг ажлаас нь халж, "өөрийн" танил тал, хамаатан садныхаа хүмүүсийг оронд нь томилжээ. Энэхүү хууль бус үйл ажиллагаа одоо ч үргэлжилсээр байгаа аж.  Сайд ахаараа далайлгаж төрийн байгууллагад "хувийн" юм шиг дур зоргоороо аашилж байгаад олон хүн эгдүүцэж эхэлсэн сурагтай.

Мөн УИХ-ын гишүүн Ж.Батзандан Баянзүрх дүүргийн босоо удирдлагатай төрийн байгууллагуудад "өөрийн" гэх хүмүүсээ шургуулж, бас л бөөн халаа сэлгээ, хэл ам дагуулж байгааг эх сурвалжууд баталж байна.  Сүүлийн жишээ л гэхэд иймэрхүү.

Ер нь төрийн өндөр албан тушаалд гармагцаа л ах дүү, амраг саднаа аль гайгүй гэсэн местэнд "шургуулдаг" нь уламжлал болсон гэхэд дэгсдүүлсэн болохгүй. Зөвхөн энэ парламентийн үед хийгдсэн зарим  томилгооноос дурьдвал, УИХ-ын гишүүн С.Одонтуяа нөхөр Г.Өлзийбүрэнгээ Газрын тосны хэрэг эрхлэх газрын даргаар, УИХ-ын гишүүн А.Бакей эхнэрээ Үйлдвэр хөдөө аж ахуйн яамны газрын албаны даргаар, дүү А.Манкейгаа Баян-Өлгий аймгийн Засаг даргын тамгын газарт Тамгын газрын дарга, эхнэрийнхээ дүү З.Сарынбекийг Замын-Үүдийн гаалийн газрын орлогчоор, УИХ-ын гишүүн Ш.Түвдэндорж ах Ш.Төмөрбаатарыгаа Нийслэлийн өмчийн газрын даргаар,  Эдийн засгийн хөгжлийн сайд асан Н.Батбаяр дүү М.Сүмбэрзулыгаа ЭМШУИС-ийн ерөнхий захиралаар гээд урт жагсаалт үргэлжилнэ. Бүр дүүргээр нь "өмчилсөн" эрх мэдэлтнүүд ч байх.

Ийм "гажиг" тогтолцооноос болоод төрийн албанд ажиллаж буй хэдэн мянган мэргэжилтэн,  өөрсдийн олон жилийн хүч хөдөлмөөр, туршлагаар ажил мэргэжлийн хувьд, албан тушаалын хувьд шат ахисан олон хүн өнөөдөр ажил, амьдралаараа хохирч байна. "Чадаж байгаа юманд арга байхгүй" гэж хандахаасаа өмнө энэ хүмүүсийн ард амьдрал байдгийг санаж баймаар байна, эрхэм дарга нар аа.

Эх сурвалж: Zuvsongolt.mn Д.Чингүүн