|

Халаасандаа 1000 төгрөг ч үгүй дарга та бидний дунд байна

tonshuul 2015/03/23 1270 0

Халаасандаа 1000 төгрөг ч үгүй дарга та бидний дунд байна

 

Орхон Аймгийн Засаг даргын шуурхай зөвлөгөөнийг аймгийн Засаг даргын орлогч Д.Энхбат удирдсан. Гуравдугаар сарын 9-ний өдөр болсон шуурхай зөвлөгөөн дээр өгсөн үүрэг даалгаврын биелэлтийн талаар ЗДТГ-ын Төрийн захиргаа, удирдлагын  хэлтсийн Хяналт шинжилгээ, үнэлгээний тасгийн дарга М.Жанболат мэдээлэв. Иргэдээс ирүүлсэн дулаан, цахилгааны үнийн нэмэгдлийн талаар мэргэжлийн байгууллагаас ирүүлсэн тайлбарыг шуурхайд оролцогчдод танилцууллаа. Өмнөх шуурхай дээр "Симба” дэлгүүр, "Орхон” цогцолбор сургуулийн удирдлагуудын ойдог баримлын шавар тойрсон бизнес санааны  талаар иргэдээс ирсэн гомдлын дагуу шалгаж хариу өгөхийг Засаг дарга С.Дангаасүрэн холбогдох албаныханд даалгасан. Гэтэл өнөөдрийн шуурхай дээр энэ талаар огт мэдээлэл хийсэнгүй. Хав дараад өнгөрч байгаа нь энэ үү, эсвэл аймгийн Засаг дарга өөрөө үүрэг болгосон учраас өөрт нь л хариуг нь уламжилсан юм болов уу гэх сэтгэгдэл төрлөө. Энэ удаагийн шуурхай дээр "Цэцэрлэгжүүлэлт ногоон байгууламж” орон нутгийн өмчит үйлдвэрийн газрын дарга Б.Гантүшиг нэлээн хатуухан, халуухан мэдээлэл хийлээ.

          Тэрбээр шуурхай зөвлөгөөнийг даргалагч Д.Энхбат даргаас үг хэлэх зөвшөөрөл авсаны дараа "Надад өнөөдөр 1000 төгрөг байхгүй учраас би таксидаж чадалгүй хоцорч ирлээ.  Шуурхайд хоцорсон шалтгаан энэ. Өнөөдөр манай байгууллагад аймгийн Аудитын газраас шалгалт орсон. Шалгалтаар санхүүгийн зөрчил, дутагдал гараагүй. Ганцхан орон нутгийн өмчит үйлдвэрийн газрын нэр, нэршлийн улмаас асуудал үүсч улмаар Аудитын газрын менежер, шинжээч нар Төрийн сан дээр байх манай байгууллагын дансыг хаасан. Үүнээс болоод бид цалин мөнгөө цагтаа авч чадахгүй, би явган явж байна. Цэцэрлэгжүүлэлт ногоон байгууламж орон нутгийн өмчит үйлдвэрийн газар байгуулагдсанаар бид их ажил хийсэн. 2017 онд тариалахад бүрэн боломжтой 10 мянган улиасны суулгац бэлдлээ. Замын хажуугийн моддыг технологийн дагуу тайралт хийсний үр дүнд өнгөрсөн зун бид модны хөвөнгүй зуслаа. Манай газар байгуулагдсанаар Эрдэнэтийн түүхэнд байгаагүй их ажил хийсэн. Гэтэл аудитын газар зарим албан тушаалтан бидний хөдөлмөрийг үгүйсгэж дансыг хааж ажилчдын цалин хөлсийг олгоход саад учруулж байна. Манайх өнгөрсөн жил 140 гаруй сая төгрөгийн төсөвтэй ажилласан. Энэ жил 240 сая төгрөг батлуулсан. УИХ, Засгийн газар, Байгаль орчин, ногоон хөгжлийн яамнаас ногоон байгууламж, эко орчны талаар олон зүйл хийж байгаа. Энэ бүхнийг аудитын байгууллага үгүйсгэж байна” хэмээн омогтойхон шиг мэдэгдсэн.

Бид мэдээллийг тэнцвэртэй хүргэх үүднээс аймгийн Аудитын газрын аудитын менежер Б.Байгалаас энэ талаар тодруулах гэсэн боловч тэрбээр "Дансыг нь хаасан зүйл байхгүй. Шалгалтын явцад зөрчил, дутагдал гарсан. Шалгалтын дүн гараагүй учраас мэдээлэл өгөх болможгүй” гэсэн хариу хэллээ. Санхүү, төрийн сангийн хэлтсийн дарга Д.Мөнх-Эрдэнээс энэ талаар тодруулахад "Энэ байгууллагын дансыг одоогоор хаасан зүйл байхгүй. Байгууллагын статусыг нь өөрчлөөд ирвэл санхүүжилт хийх боломжтой” гэлээ.

erdenetnews

Санал болгох

Сэтгэгдэл

top