|

Дөчин айл эко 00-той болжээ

saikhnaa 2017/08/18 1793 0

Энэ оны долдугаар сард эко жорлон барих төсөл дөрвөн байршилд хэрэгжсэн юм. Өмнөговь, Говь-Алтай, Эрдэнэт, Баянзүрх дүүрэгт хэрэгжсэн төсөл хэдийнэ дуусаж, үр дүнд нь 40 гаруй айл жорлонгийн асуудлаа бүрэн шийджээ.

Аймаг бүрт хэрэгжсэн төслүүд өөрийн онцлогтой бөгөөд нүхний асуудлыг сонирхолтой аргаар шийдсэн байна. Жишээлбэл, Баянзүрх дүүргийн 27-р хороонд үерийн ус ихээр буудаг хэсгийг сонгон авчээ. Нүхийг битүү цементлэлгүй бетонон кольцо суурилуулсан байна. Энэ нь цаг хугацаа хэмнэхээс гадна танд "насан туршийн баталгаа” олгож чадах гэнэ.

Тэгвэл Өмнөговь аймагт үерийн усанд их өртдөг хэсгийг сонгон авч, нүхийг тоосгоор битүүлэхийг санал болгож, бие засах хэсэгт модон суултуур хийсэн байна. Төслөө хамгийн богино хугацаанд гүйцэтгэсэн баг нь Орхон баг юм.

Тэд нүхийг бетондох эсвэл хүлэмжийн уутаар битүүлэхийг санал болгосон юм. Говь-Алтайд хэрэгжсэн "Эко 00-Алтайд" төсөл нүхээ өөрсдөө бетондохыг санал болгожээ.

Баянзүрх, Өмнөговьд хэрэгжсэн төслийн хувьд үерт ихээр нэрвэгддэг айлуудаас сонгосон бол Говь-Алтай, Орхонд нээлттэй уралдаан зарлаж, хамрагдахыг хүссэн айлуудаас сонгон дэмжлэг үзүүлсэн байна.

"Нутгийн шийдэл" сангаас санаачлан оюутнуудын хэрэгжүүлж буй энэ төслийн хүрээнд 50-70 хувийн материалын дэмжлэг үзүүлсэн бөгөөд 40 айл сайжруулсан ариун цэврийн байгууламжтай болж, иргэд хөрсний бохирдол ба нүхэн жорлон, эко жорлонгийн талаархи мэдээллээ тэлсэн юм.

Санал болгох

Сэтгэгдэл

top