УИХ-ын хаврын чуулган эхлэхтэй зэрэгцэн МАН-ын бүлгийнхэн УИХ-ын гишүүн Д.Гантулгын бүрэн эрхээсээ түдгэлзэх хүсэлтийг хэлэлцэв. 

Учир нь, УИХ-ын гишүүн Д.Гантулгыг прокурорын байгууллагаас яллагдагчаар татаж, УИХ-д бүрэн эрхээс нь түдгэлзүүлэх хүсэлт тавьжээ. Тиймээс УИХ-ын гишүүн Д.Гантулга өөрөө бүрэн эрхээсээ түдгэлзэх хүсэлтээ УИХ дахь МАН-ын бүлгийн хуралд өнгөрсөн баасан гаригт танилцуулсан байна.

УИХ-ын тухай хуулийн 6.13-т "Гишүүний бүрэн эрхийг түдгэлзүүлэх эсэх асуудлыг Төрийн байгуулалт болон Хууль зүйн байнгын хороо, УИХ-ын гишүүний халдашгүй байдлын дэд хорооны санал, дүгнэлтийг үндэслэн нэгдсэн хуралдаанаар хэлэлцэж, хуралдаанд оролцсон гишүүдийн олонхын саналаар, нууц санал хураалтаар шийдвэрлэх” гэж заажээ. Иймээс түүний хүсэлтийг МАН-ын бүлэг хүлээн авч хуулийн дагуу УИХ-ын гишүүний халдашгүй байдлын дэд хороогоор хэлэлцэхээр болсон юм.

Уг дэд хороо хуралдсан , боловч хуулийн мухардалд орсон талаар Хууль зүй, дотоод хэргийн сайд Ц.Нямдорж хэлэв.

Учир нь, Улсын ерөнхий прокуророос ирсэн санал нь Үндсэн хуулийн Цэцээс хүчингүй болгосон УИХ-ын тухай хуулийн 6.9-т үндэслэсэн аж. Үндсэн хуулийн Цэцийн хуралдаанаар УИХ-ын тухай хуулийн 6.9.1 буюу Улсын ерөнхий прокурор УИХ-ын гишүүнийг гэмт хэрэг үйлдэж байхад нь нотлох баримттайгаар баривчилсан үед түүний бүрэн эрхийг түдгэлзүүлэх саналыг УИХ-д оруулах тухай заалтыг хүчингүй болгосон юм. Харин УИХ өдийг хүртэл энэхүү заалтыг өөрчилж, хуульд нэмэлт оруулаагүйгээс ийнхүү хуулийн мухардалд орсон аж. 

Тиймээс одоо уг хуульд өөрчлөлт оруулах хүртэл УИХ-ын гишүүн Д.Гантулгыг бүрэн эрхээс нь түдгэлзүүлэх асуудлыг хэлэлцэхийг хойшлуулав.

Б.ЦЭНД-АЮУШ, ҮНДЭСНИЙ ШУУДАН