Амжиргааны түвшин өндөр өрхүүд хүүхдийн мөнгөө хүсэлт гаргаж авна

Ирэх оны төсөвт хүүхдийн мөнгийг 144 тэрбум төгрөгөөр суулгасан. Өмнө нь 200 гаруй тэрбумаар батлагддаг байсан уг мөнгийг эдийн засгийн хямралтай холбогдуулан танаж, амжиргааны төвшнөөр ялгаж олгохоор болсон юм.

Ингэснээр хүүхдийн мөнгийг ирэх жилээс Хүн амын хөгжил, нийгмийн хамгааллын яамнаас хийсэн өрхийн мэдээллийн сангийн судалгаанд үндэслэн олгоно. Тодруулж хэлбэр, Монгол улсын нийт айл өрхийн амжиргааны түвшинг 20 бүлэгт хуваан үздэг. Үүнээс 1-17 дугаар бүлэгт хүүхдийн мөнгө ирэх онд хэвийн олгогдох юм. Эдгээр бүлгүүдэд нийтдээ 823 мянган айл өрх багтаж байгаа гэх тодруулгыг салбар яамнаас өгч буй.

Харин 18-20 дугаар бүлэгт багтах амьдралын түвшин бүхий айл өрхүүд хүүхдийн мөнгө авах эрх эдлэхгүй. Гэхдээ хүүхдийн мөнгөө авахыг хүссэн тохиолдолд өргөдөл гарган өгснөөр эрх нээгдэнэ гэдгийг салбарын сайд нь онцолж байгаа юм.

Жил бүр Хүний хөгжил сангийн дансанд хүүхдийн мөнгөний үлдэгдэл 5 тэрбум орчим төгрөг үлддэг байна. Энэ нь хүүхдийн мөнгө авах шаардлагагүй гэж үздэг амжиргааны түвшин өндөр өрхүүдийн мөнгөн хуримтлалаас бүрддэг аж.

Ж.Мядагбадам

Эх сурвалж: www.TODAY.mn