Тодруулбал тус компани өнгөрсөн 2015 оны зургадугаар сараас хойш ажилчдынхаа цалинг тавиагүй өнөөдрийг хүрчээ. Тиймээс "Алтайн хүдэр”-ийн ажилчид өчигдөр цуглаж, суулт хийсэн юм. Суулт хийхээр ирсэн ажилчид ярихдаа " Биднийг өөрийн хүсэлтээр ажлаас халагдах юм бол хоёр хоёр сая төгрөг өгнө гэж хэлсэн. Тиймээс бид оны өмнө ажлаас халагдах өрөгдлөө гаргаад өгчихсөн юм. Гэтэл цалин ч өгдөггүй, амласан хоёр сая төгрөө ч өгөөгүй, хулхидчихлаа. Мөн энэ компани 2013 оноос хойш ажилчиддаа амралтын мөнгө гэж нэг ч төгрөг олгоогүй” гэв.

"Алтайн хүдэр” компанид 800-1,000 хүн ажилладаг бөгөөд 800-н хүн цалингүй ажиллаж, зөвхөн төв оффист ажилладаг хүмүүс л цалин авч байжээ. Харин оны өмнөхөн ажилчдынхаа 80 гаруй хувийг ажлаас халсан юм байна.

"Алтайн хүдэр”-ийн ажилчиддаа олгох цалингийн өр нь аль хэдийн 6 тэрбум давжээ. Тиймээс тэд цалин тавьж чадахгүй байсаар, өдөр ирэх бүр санхүүгийн асуудалд орж байгаа юм байна. Харин компанийн зүгээс үүнийг тайлбарлахдаа " Дэлхийн зах зээлд төмрийн баяжмалын үнэ унасан учир сүүлийн хоёр жилд 30 тэрбумын алдагдалтай ажиллаж байна. Өнгөрсөн 12 дугаар сарын экспортын төлбөрийг авч хуримтлагдсан цалинг олгохоор төлөвлөсөн боловч худалдан авагч болон эцсийн хэрэглэгч хоёрын төлбөрийн нөхцлөөс хамааран одоог хүртэл хүлээгдэж байгаа. Компанийн удирдлагуудын тухайд 2016 оны эхний экспортын гэрээг байгуулах худалдан авагчтай хэлэлцээр хийхээр урд хөршид томилолтоор ажиллаж байна. Борлуулалтын орлого орж ирмэгц ажилтнуудын цалингийн хоцрогдлыг нөхөн олгоно” гэдэг тайлбар гаргажээ.