Эрхэм хүндэт багш сурган хүмүүжүүлэгчид, хүүхэд, багачуудаа. 
Та бүхэнд хичээлийн шинэ жилийн баярын мэнд хүргэе.  Оюунлаг, чадварлаг, бүтээлч "Монгол иргэн”-ийг төлөвшүүлэх их үйлсийн нэгэн мөч тохиож байна. 2016-2017 оны хичээлийн жилд манай аймгийн их, дээд сургууль, МСҮТ-д 3000 гаруй оюутан, сургуулийн өмнөх боловсролын байгууллагад 7500,  ерөнхий боловсролын  сургуулиудад 18 мянга орчим сурагч суралцахаас нэгдүгээр ангид 2000 гаруй хүүхэд элсэн орж байна. 
Энэ хичээлийн жил нь "Боловсролын чанарын шинэчлэл”-ийг үргэлжлүүлэн, "Бүрэн дунд боловсролын цөм хөтөлбөр”-ийг хэрэгжүүлэх онцлогтой бөгөөд чанартай боловсролын үйлчилгээ үзүүлэх, тусгай хэрэгцээт боловсролд онцгой анхаарах, насан туршийн боловсролын тогтолцоог төлөвшүүлэхэд гол зорилго нь оршиж байна. 
Өдрөөс өдөрт өргөжин тэлж буй манай аймаг, Эрдэнэт хотод сургууль, цэцэрлэгийн хүртээмжээ нэмэх, хүүхэд,  залуусаа дэмжсэн бодлого, хөтөлбөр шаардлагатай байна. Иймд энэ хичээлийн жилээс эхэлж бид "Оюутны тэтгэлэг”, Засаг даргын нэрэмжит "Урамшууллын тэтгэлэг” –т хөтөлбөрөө  эхлүүллээ. 
 Иргэн бүрийн боловсролын төлөө төр, засгийн зүгээс анхаарч, бодлого, шийдвэртээ тусган ажиллаж байна.  Хичээлийн жилийн хонхны дуу хүүхэд, багачууд, залуус та бүхний их мөрөөдөл, зориг, итгэлийн тань түүчээ байх болтугай. 
Та бүхэнд 2016-2017 оны хичээлийн шинэ жилийн баярын мэндчилгээ дахин дэвшүүлж, ажлын амжилт, сайн сайхан бүхнийг хүсэн ерөөе.

      Орхон аймгийн Засаг дарга бөгөөд Эрдэнэт хотын захирагч           Д.Батлут